لازم اثبت اني قد المسؤوليه واحل محل أمي!(مُحَدَّث يوميا إن شاءلله)

يوم رقم ( 1)

أمي سافرت جده ( يقولون ) استجمام وفسحه نفسيه من هم البيت ومسؤوليات العيال!!

والمسؤوليه طبعا طاحت على راسي (يقولون ) لأني الكبيره ولازم احل محلها

طبعا من أول ساعه غابت فيها فعلا انقلبت الدنيا وبدأت سلسلة المتاعب واصطبحت على اختي المصونه ” توته ”

توته : فرح قومي دبري احد يوديني ابغا اشتري هديه لـ “نوره ” اليوم حفلة نجاحها !!

انا : بديت اعصب بس اتذكرت ان المشوار طويــل

ولازم اطول نفسي واصبر .. أمي لازالت تحلق بالسماء ولم تحط الطائره على مدرج مطار جده .. كيف أبدأ بالتذمر ..

عييييب!!

ولابد اثبت اني ” قد المسؤوليه ”

انا لتوته : اخذتي فلوس من ابوي امس ؟

توته : (بوجه ملون) لاااااا نسييييت بس مو مشكله ادفعي انتي وبحاسبك بعدييين

( عادي كالعاده هي دايم هذا نظامها حاسبي واعطيكِ بعدين وياقلب لاتحزن مانشوف شي!!)

تك توك طيط طوط اتصلت  على ( آصاد السواق) هاه اصاد وينك ؟

انا في بيت الهين..

وجاء وطرنا صاروخ على اقرب “سيتي بلازا ” بعد ماحطيت ورقه بخط سيريالي تحت باب غرفة أبوي احتياطا لو قام وماحصلنا بالبيت واعطيته خبر اننا رايحين نشتري هديه نلحق الوقت المتطاير كانت الساعه 10 صباحا!!

اشترت لها كم خربوطه من خرابيطها كأنها شغلات ” باربي ” ولا ” فله ” علما بأن ” توته ” اتخرجت هالسنه من الثانويه !!

وغلفناها و” اصاد” منتظر برا وناوي نيه مش ولابد .. بعد ماغلفناها ست الحسن المصون ماعجبها شكل التغليف وفكتهاوطلبت ثانيه وشغلانه طويله…

خلصنا أخيرا .. وهات ياركض لين البوابه بس .. وين اختفى آصاد ؟؟

دقيت بالجوال : وينك ياأصاد؟ أنا الان اجي ..

” المحروس آصاد السواق ” طفش ونط سوبر ماركت بنده يشتري له ” فلفل”!!

انتظرت .. وانا عيني على اختي اللاهيه بهديتها  >> حراسه مشدده (يقولون ) لازم احل محل امي..

اتأخر ..جيت بدق على سي السيد حصلت جوالي مغلق ” خلصت البطاريه ” كأني ناقصه بهذا الحر تعذيب !!

اضطريت انتظر تحت الشمس ليييين شرف وركبنا وطلبت منه شاحن وشغلت جوالي حصلته متصل (3اتصالات وجوالي مقفل) ووجه كأنه ناوي ” يصفقني”

قلت له من زمان انت هنا ياآصاد (قصدي عسى ماطولت عليك )؟

قال : لالا ..بس انا روه بنده ايش ابغا انا انتزار هنا في هر ( تبغيني انتظر بالحر) طلع له لسان عشاني ضعيفه وماعنديش ماما !!

وصلت البيت على الظهر يادوووب اخذت نفس..

صحي ” الوالد ” هاه وين رحتوا (قرأ الورقه ) .. واخذنا كم محاضره على كم تهزيئه كله عشان خاطر الكحيله خيتو ” توته ”

بعدها طلب نحط الغداء!!!

غداء .. ( بتأتأه ) ايه الان احط السفره .. وجري للمطبخ ايش احط انا ماطبخت !!

الحمدلله لقيت إدامات ورز من امس حميتهم ( الله يخلي الميكرويف) .. إلا وابوي داخل فيه غداء يكفي جايين رجال!!!!!!

طارت عيوني بس اردد ” لازم اكون قد المسؤوليه واحل محل امي”

ورجعنا كثرنا الكميات ورقعنا الوضع انا واختي الثانيه ” بيشو” لأن ” توته ” قاعده تجهز نفسها لحفلة صديقتها ولا حابين ننكد عليها..

بيشو ( بينها وبين توته بس بس  11 شهر) وهي الاكبر ..حطينا الغداء وانتهينا .. دخلت انام شوي ..

صحيت اشوف المحروسه ” توته ” لقيتها لابسه لبسها للحفله لكن مو جاهزه ومستعده تماما .. وقاعده على ” الماسنجر”!!

” توووووووووته ” ( بصراخ وغضب ) مين تكلمين قووووومي اخلصي يالله يمديك صاحبتك بتمرك يالفاضيه؟

طبعا نقزت نقزه من صرختي بالذات ان صوتي مرعب لما اقوم من النوم هههه

ولبست بعد صراخ ونفيخ الله لايوريكم .. وهي طالعه بوجه قوي تلتفت لي ( فرح عندك 50ريال) لييييييييش؟

ابغا امر كون زون ولا باسكن روبنز اشتري سطل ايس كريم لها هديتي بسيطه مررررررره !!!!

عطيتها الفلوس .. شوي تنادي من عند الباب ( يوووه نسيت البس حلق هاتوا لي حلق احمر بسررررررررررعه هذا وهي بالعبايه والسياره عندالباب)

طبعا انا ماسكه اعصابي وبيشو اعطتها حلق له مكانه ومعزه خاصه وللأسف ان ” توته” دايم مضيعه ..ومعروفه بتضييع الأغراض والحوسه

مامداها توصل إلا وبيشو داقه عليها ” شوفي والله العظيم لو ضيعتي الحلق ياويلك مني ”

توته : هاه .. اصلا ماخذته انا خليته فوق الطاوله البنيه حق الصاله اللي تحت !!

بيشو : عاااااارفتك انا طول عمرك كذا .. ماعطيتك شي ورجعتيه ..وتهزيء في المسكينه وماخارجت هالحفله المشؤومه هههه

طبعا للآن اكتب هالكلام وبيشو تدور بالبيت تدور الحلق الأحمر الضايع اللي بـ 5 ريال بس ماادري ايش السر فيه ! ( دلع بنات من جد )

هذيك طلعت من هنا .. دق ابوي بالجوال (فرح فيه رجال جايين جهزي قهووه) هيء هيء هيء

طيب ابشر .. وجهزنا القهوه بس المشكله مو هنا .. المشكله في الصراخ اللي طالع من مجلس الرجال وش قصته !!

طلعت جلسة تحكيم في توزيع ميراث احد الأقارب وخناقه بين الأخوان (الورثه ).. الله المستعان .. طيب انا ايش دخلني ارتبش معاهم

طبعا تحت تأثير حرق الأعصاب والجدل بمجلس الرجال .. ابوي معصب هاه وين ” توته ” ؟؟ ماجااااات؟؟

إلا إلا الان جايه ان شاءلله ..

وتدق ” بيشو ” تووووووووووووته ارجعي بسرعه ابوي معصب ويسأل عنك

توته : ايش اسوي طيب البنات توهم داخلين خلاص

لييييين وصلت بالسلامه وشايله شنطتها وعبايتها تسحب بالأرض وتحفه ذكرى من الحفله وصحن الكيكه + اكل = بعد هالعذاب كله ما جلست زي الناس ولا أكلت مع صحباتها!!

وين ابوي .. ؟ ( خايفه)

اكلنا احنا الكيكه وهي تتنافض .. ماخلصت نفضتها إلا و احنا مخلصين كل الأكل اللي جابته ولا ذاقت الكيكه حتى !!

ودخلت الان زعلانه ونامت بغرفتها ياحرام .. لكن ناويين نعوضها بدل نكد انا وبيشو..

طبعا حطينا عشاء للرجال وشاهي وقهوه … الخ .. وإلى الان بالمجلس واصواتهم واصلتني والله يستر اشوف الكل نشر غسيله وللأسف اخوان

فعلا الفلوس تعمي النفوس ولو ابوهم عرف ان الفلوس بتسوي فيهم كل هذا ماكان ترك لهم فلس وياحرام ابوي عنده ضغط وسكر وكولسترول الله يحفظه لا يقضون عليه لأن الظاهر ماهم ناويين يتفقون ابدا .. ابدا ..

يالله تصبحون على خير ( هذا تلخيص اليوم الأول)

———

يوم رقم ( 2)

كمان ( يقولون ) ” الفاضي يعمل قاضي “فقررت (قرارين اليوم )

الأول : اني اسجل بدورة فوتشوب ((بمعاهد نيوهورايزن)) هالصيفيه وقالوا لي عندهم دورتين او بالأحرى جزئين الأول بـ 800 ومع الثاني يصير 1200مع ( الفلاش)

عموما رتبت وضعي وإن شاءلله بتبدأ بعد اسبوعين من اليوم .. وابغى مشورتكم هل اخذ جزء واطور نفسي ويكفي ولا اخذ الجزئين؟؟!

نجي عند القرار الثاني ( قرار عنتره) وهو تقشيع وتنظيف المطبخ والمستودع 🙂

طبعا اتشجعت بعد مااتصل ” ابوي ” الله يحفظه وقال بيتغدى برا ( معزوم ) اتغدينا انا وتوته وبيشو اندومي والحمدلله نعمه ..

قررت اقلب المستودع  حق المطبخ وانظفه وارتبه ياحلو شعور النظافه والترتيب بعد التعب والكد  ( منها تسليه وفايده)

مسكت معاي زي مامسكت قصة ” الملوخيه اللي مر على واجب الأسرار” بيعرف هههههه بس لاتصيرون مثل السيد مراد وتعليقه على مصيبة الملوخيه ..وتضحكون علي ارفعوا معنوياااتي ( مفهوم) ..

المهم ماعلينا.. شمرت عن السواعد وتأبطت عزيمتي وهمتي الشبابيه وخبطت على صدري بكل ثقه

( اقدر أحل محل أمي )>> سياسه نفسيه للتغلب على المشكلات

وربطت الكوشه واخذت نفس وغصت بالحوسه بـ ( انسجام ) لاتسألون كيف كان وضعي لأنه مزري واتورطت واللي كان كان ومافيها رجعه بعد ماقلبت الدنيا رأسا على عقب !! يقااال ( إذا وقعت يافصيح لاتصيح!!)

وطالما بدأت بالتنظيف العميق والفلسفه اللي مالها داعي .. إذا لازم اكمل المشوار للنهايه تعرفووون (لازم أحل محل أمي ) عقبال ماتحلون محل امهاتكم بالعافيه..

والله اول مره اعرف إن لياقتي ” زيرو على الشمال”!!

شنقله وبهلوانات من سنين افتقدتها ..لكن الحمدلله ” ماكو أي اصابات ”

وهذه صوره من العفسه المحترمه

طبعا انهكت بما فيه الكفايه وخليت كل شي ( وبكمل بكره)

تدرون ايش اللي خفف عني التعب كله وأعطاني شحنه وطاقه اكبر لإنجاز العمل؟؟

بيشو أختي الله يخليها  الأموره جابت لي هديه ” بمناسبة نجاحي بامتياز هالترم” منها ومن خطيبها الله يوفقهم إن شاءلله .. ( دعواتكم لهم بالسعاده )

جبت تفاجئني .. وفرحت جدا انها اتذكرتني لأن الهديه بالذات بزمن ” النسيان ” وممن تحب  أغلى شيء بالوجود

ويابيشوو .. كثروا الهدايا عشان اضبط لكم الزواج زين اتوصي انتي والسيد متولي حقك والله لايحرمنا قلوبكم الطيبه هههههه

خلاص انهد حيلي من الفرح والتعب مع بعض ويكفي اليوم ” تغطيات ” ونوافيكم بالمستجدات بإذن الله كونوا معنا …

دمتم سالمين أعزائي،،

——————–

يوم رقم (3)

ولازال مسلسل الإجتماعات والرجال مستمر .. مافي حيله إلا واستخدموها معهم لكن الأمور قاعده تتعقد!!

كل هذا من الفلوس ؟؟ اعوووذ بالله

مافي شي جديد غير ” الملل والفراغ ” المسيطر على البيت ” فعلا بديت اشتاق اكثر لأمي ”

العصر سوينا لنا ” نسكافيه مع سنكرس ” وجلسنا امام التلفزيون لا طلعه ولا خرجه طبعا بسبب ” مؤتمر القمه في المجلس!”

من الملل سويت مع اختي برواز حلو بالأوراق الملونه والقصاصات من تصميمنا ( سيتم إنزال الصوره قريبا ) لعطل فني 🙂

اختراع صاروخي 🙂

اممممم بس غير كذا مافي شي يذكر بصراحه … ايه صح الشغاله ابشركم رتبت الحوسه 🙂

>>> أجل ايش سويتي ياأم السنع!

—————–

يوم رقم ( 4)

مافي غير ” ليز” و”ميرندا فراوله”

ماتلاحظون الأحداث كل مالها تقل ؟!

بس إن شاءلله بحاول اسوي لكم فلم اكشن قريبا بإذن الله 🙂

إلى لقاء قريب..

———-

يوم ( 5)

أبدا لاجديد أييضا على الساحه غييير إن ” اختي ” بيشو حبت تروح زواج صديقتها اليوم ولكن ابي رفض بسبب عدم تواجد ” الوالده ”

فوضى جديده بسبب غياب ” ست الحبايب”!!

رغم ان والدي يمنحنا كثير من الثقه لكن أعترف أننا لازلنا نخاف سياط المجتمع ونظرته القاصره ” للبنت ” وكأن الوضع يختلف إن تزوجت !!

الله يرجعها بالسلامه يارب ” اشتقت لها ”

———–

يـ ـ ـوم رقم  (6)

ابوي كعادته رحيم وقلبه حنوووون .. طبعا امس رجع وطلب من اختي تلبس ويوديها الزواج لكن ماكان الوقت يمدي ..

لذلك قرر اليوم يودينا نتمشى ونتفسح فسحه عائليه دافئه الله يسعده ويحفظه قولوا امين

طبعا رحنا ” الرياض غالري ” اللي يثبت جنون المراكز في عاصمتنا الرياض!!

كبير بطريقه تجعلك محبط وما تحاول تدور او تلف فيه!! يمكن هذا شعوري لاأعلم؟! انا لما اشوف مكان كبير جدا يجيني احباط واصير اجلس بأقرب كرسي

وافضل اتعشا واشوف اللي حولي فقط مااحاول ابتعد اكثر إلا في حالات لما اكون ناويه اشتري شي او مافي احد ينتظرني وطبعا الوالد مايحب المراكز ولا الأسواق راح معنا ” جبر خاطر ” 🙂

اتعشينا و وحلينا من كرسبي دونتس كالعاده …والدنيا كانت زحمه والمواقف على كبرها ماحصلنا موقف إلا بعد طلوع الروح !!

على قد المراكز وكبرها بالرياض لكن كل ماتروح مركز تحصل ” زحمه” وأطلقت على ظاهرة المراكز وكثرتها ” جنون المراكز ” الناس مجنونه والمستثمرين مجانين وكلا يكبر ويبني ماهمه مين جنبه ” همه فقط كيف اقدر اكسر اللي جنبي واخطف الأضواء ” اتميز بكيكا (محل أثاث ) كونه دخل ضمن شلة السوق لكن ماحبيت كيكا حسيته مو منظم واسعاره مبالغ فيها بصراحه !!

اما السوق روعه وفيه ماركات جديده ومتنوعه وفعلا مكان لكل شي ” خلاصة الموضوع ” انبسطنا 🙂

أحلى شي غابة المقاهي اللي تحت قعداتها حلوه ومميزه عن المراكز الأخرى

هذا جديدي فقط لليوم أراكم غدا .. 🙂

———–

يـــومي رقم ” 7 “

سجلت بدورة فوتشوب ساعه باليوم استفيد وأفيد على مايقولون قضاء حجه وحاجه .. وهروب من دائرة الملل والفراغ ..

لحين عودة الوالده ..

هذا أهم شي صار مافي ” اكشنات ” الروتين ممل نوم وأكل لاغير!!

المفاجأه اني لما دقيت على المعهد استفسر عن الدوره ومستوى المعلمه مدحولي كثير المدرسه وبشروني بنتائج طيبه

وأنا جالسه بالمعقد بمكتب المحاسبه لدفع مستحقات الدوره واتمام اجراءات التسجيل

افاجأ بدخول وحده تسأل المحاسبه .. كانت تدرس معاي ايام الثانوي وتشاركنا كثير ايام حفلات وأنشطة المدرسه

كان ودي اخذها بالحضن والسلام بس اترددت لما شفتها تسأل عني وقلت بنفسي اكيد ” ناسيتني ” بعد هالسنين وعوامل التعريه .

هي تسأل : فرح اللي على اساس تسجل اليوم جات ولا لا؟؟

وانا قاعده قدامها (لكن على مايبدو مانتبهت لتواجدي) .. ردت عليها المحاسبه هذه هي جات

اتجهت نحوي مبتسمه تقوللي ” فرح تراني اعرفك” رديت عليها بابتسامه ” وانا ايضا اعرفك ”

كيفك ياامل .. كيفك يافرح ( وراحت نص ساعه سواليف ) وضاعت الدوه هههههههههه

كانت بنت هاااااااادئه جدا جدا في الثانوي الآن اصبحت أصبحت اكثر جرأه ونضوج اختلفت كثيرا لكن ملامحها لم تتغير أبدا ..

فبطبيعة الحال ماكان مكاني على أجهزة الحاسب الموجوده في المعامل واختارت امس انها تقهويني ونتعلم على ” اللاب توب الخاص تبعها” 🙂

واعطتني شغلات حلوه في فلاش وصور مميزه احملها

انبسطت وارتحت كثير لما عرفت انه امل هي اللي بتطيني الدوره .. للأسف اواجه مشكله لما جيت اناديها امام المتدربات ماقدرت اقولها ” استاذه”!!

اضطريت اناديها بإسما مثل ماتعودنا .. يا أمل ( كانت تدرس بنفس المدرسه أصغر مني بسنه ) وصارت أستاذتي الآن ..الله يوفقها يارب

تصاميمها جميله جدا ولها حس فني .. استغرب أين كان مختبيء أيام الثانوي !!

هذا كل شيء ..لنا لقاء أحبتي 🙂

———

يومي رقم (8 )

مستمره بدورة التصميم لكن ألمح ظروف قهريه تجبرني اني اسحب !!

ادعولي استمر لأن نفسي اكمل ..

كالعاده ماتجي أمنيه إلا وتتبعثر سبحان الله !!

لاجديد إلا أن الوالد جاء وسهر معانا ودارت سواليف شيقه لم تخل من الضحك والمزح الله يديم الأفراح إن شاءلله..

رتبنا غرفة أخوي لأنه جاي الأسبوع القادم بإذن الله مشتاقين له لنا 8شهور ماشفناه ..

أما شغالتنا فطلعت مواهبها في الطبخ والمسؤوليه اذهلتنا .. واعترفت انها تخفي هذا كله عشان مايزيد عليها ضغط العمل !!

واعترف أنها ساعدتني وشاطرتني بكثير من المهام والأمور مستتبه نوعا ما ..

———–

يومي الـ (9)

تعبانه سني جدا يعورني تعبت من هالسن والله ماابالغ لي سنتين او اكثر الاحق وراه أصلا ماباقي إلا ” اطلال ” منه ولا خلاص ينازع

طبعا من دكتوره لدكتوره آخيرا عملت لي دعامه حديد وقالت شوفي اسبوعين ثلاث إن ماآلمك نسوي لك تلبيسه !!

تلبيسات ولسا في هالعمر الله يخلف !

انا ماعندي مشكله المهم اخلص اليوم مره يعورني شكله التهب وبكره بروح لها وعلى مايبدو ستتم عملية إعدامه أخيرا 🙂

هذا الموجز .. 🙂

الأوسمة: يوميات