مشهد واقعي (إعلامنا والنقاب)!!

هي : صباح الخير فروحه..

فرح : صباح النور والسرور ( بتثاقل ونعاس)

هي : لسا نايمه يالكسلانه قووومي خلاص .. بصير مشهوره باركي لي.. ههههههه

فرح : وشو حررتي القدس ؟؟>> بتريقه

هي : انطقي يافرح.. وش دخلني بالقدس انا يالله يالله نفسي.. ( كلا على همه سرى من جد )

فرح : طيب ايش اخلصي برجع انام؟

هي : عندي مداخله بكره بالتلفزيون..

فرح : مداخله ؟؟ اي مداخله تقصدين ياكثر مداخلاتك يا …. كل يوم تطمرين بقناة

هي : صحصحي طيب..  مو هنا المفاجأه ..  

فرح : يوووه هاه اجل؟

هي : ببرنامج  ( ………) بالقناة الأولى

فرح : وييييه ( ………) ماااااااالت .. على بالي شي محرز اتغطي ونامي احسن .. انتبهي لايقطِّع الصوت مثل المرات اللي قبل فضيحه..

هي : يامسكيييييينه مو صوووت .. اتطمني

فرح : اجل ايش ؟!!!!

هي : صوت وصوره بالإستديوووو مباشر

فرح : ( فزيت من سريري غصب ) مجنووونه انتي ؟ وش اللي ( صوره ) انخبلتي أص .. أص .. لا أحد يسمعك بس!!!

هي : لالا .. ابشرك دقت معدّة البرنامج تقول من زمان نفسنا نستضيفك بالبرنامج والحمدلله الآن ( سمحوا باستضافة المنقبات )

فرح : والله ..زيييييين ..زين فرحتيني أصلا المفروض من زمان (يسمحون بالنقاب).. نفسي اعرف النقاب يعيق اللقاء بإيش؟ايش ضرره ؟ كأن الناس ناقصين وجوه حريم تطالع فيهم صبح وليل على التلفزيونات!! (الحريم فرجه ولا شاشة سينما ) وياما خسروا عقول وأراء نساء عليهم القيمه بسبب هالقرار ..لكن الله يبشرك بالخير ( فُرجت )

هي : الله يعين بس وماارتبش مو متعوده على أضواء الشهره ..

فرح : اقول لا تفشلينا اركدي وسوي تمارين استرخاء قبل ماتتكلمين وركزي

هي :إيــه صح من كثر المتابعين ماشاءالله !! هههههه

فرح : المهم انتبهي .. على فكره عن ايش بتتكلمين؟؟

هي : عن ( التحرش الجنسي بالأطفال) كثير مشاكل تجيني بالعياده بسبب هالمشكله ..

فرح :موضوع مهم  .. بس شاورتي مُعدة البرنامج ترى ياكثر ” الممنوعات “؟

هي : لا والله بس تتوقعين ترفض ماتدرين انه نسبة التحرش بالأطفال وصلت ….

فرح : (قاطعتها ) لاتتفلسفين الحين الحقي دقي عليها انا حاسه انهم بيقولون لك لا

هي : لااااا عاد بتحطم

فرح : شوفي انتي وكلميها .. وقولي لي وش صار

(بعد نص ساعه او أكثر )

هي : سلاااااام

فرح : وعليكم السلام ورحمة الله ..هاه شكل صوتك يسد النفس؟

هي : أبد..  كنسلنا كل شي.. وعصبت عليهم بقاصر هاللقاء !!!!!

فرح : ليش طيب؟

هي : ( عادي ) .. ( ممــنــوع )

فرح :ليش ملائكه ؟

هي : لا نخاف نثير الخوف و الفزع بين اهالي الأطفال!!!!

فرح : اجل مريني بس.. ونروح نشتري شي بارد حاسه اني بحترق !!

هي : طيييب أجيب معي جريدة الرياض ؟

فرح : اقووووووووول جيبي معاكِ ثلاجة السوبر ماركت كامله!

هي : لا يامجنونه افهميني ناويه أعلن انتحاري ( جريده أصبح سوقها ماشي بالإعلانات )!!

سيناريو وحوار ( الواقع )!!

 

سين ( سؤال )

إعلامنا ماهدفه بالضبط؟ وايش رسالته ؟ وماهي خطة التنفيذ المتبعة ليصل لشيء اختبأ عني؟!!

أفيدوني فلم أعد افهم هذا (الإعلام) المتذبذب كل يوم !!

الأوسمة: مرأه, إعلام, المرأه المنقبه