ثاني يوم دوام

طبعا انلدغت من زحمة أمس وخنقة السيارات ، فقررت اليوم أطلع مبكره أكثر والحمدلله اتسهلت الأمور ووصلت بدري حسب الوقت المطلوب بدون أي مشاكل..

قررت بما أني مروقه ووصلت بدري خصوصا إن الجو جميل والجو آخر روقان إني احتسي كوب قهوه قبل هجوم الطالبات على الساعه 8 صباحا فـ اتجهت لـ (آلة القهوة ) الموجوده في ممرات المبنى أدخلت ( ريال ) على بالي ( ببسي ) لكن الأله بلعت ريالي و لا شفنا قهوه ولا مايحزنون ! انتظرت .. وانتظرت ومتحمسه ارعص على قولتهم على زر( قهوه مركزه ) و ( اضغط على مقياس السكر ) لكن لاحس ولاخبر .. ضربت ، رفست يمين يسار يابنت وين القهوه ( ولاشي ) !! طلعت القهوه بريالين ولازم أدخلهم ورا بعض بسرعه ..

بيني وبينكم مستحيه اقول ابي ريالي ولا أروح اقولهم ريالي راح طلعولي القهوه وأصلا أروح لمييين مافي إلا آله ! القهر مو على الريال بقد شعوري وإحساسي اني ضعيفه أمام آله تسرقني عيني عينك لا إحم ولا دستور حسيتها تتحداني وانا فاتحه فمي 🙂

المهم شلت نفسي ورجعت لمكاني حزينه إنه مافي قهوه، شوي إلا وجايتني زميلتي الجديده اسمها (مي) تقوللي مالت على آلة القهوه.. ليش ياميّ؟ قالت : حطيت ريال وأبغا أدخل ريال بعده قمت دخلت 10ريال وراحت القهوه والـ 11ريال !

قلت بقلبي مدام السالفه فيها 11ريال راحت وبدون قهوه أجل اهجدي يافرح ،بصراحه أنا افكر اكسر الآله هذه شاكه إن داخلها مئات الألوف وتشتغل شغل أحسن من البوفيهات والمقاهي و آمنت إنها فكره ذكيه وأنه مكاسبها مو على القهوه بس وعرفت ليش قهوتها بس بـ ريالين ، شغاله استغلال بعقول الناس الدايخه وتقعد تبلغ بفلوسهم  🙂

أنا مايأست رجعت لها مره ثانيه و لقيت وحده من الطالبات المستجدات تنتظر  وتطالع باندهاش، انا ابتسمت لأني كنت متوقعه حصل لها نفس المقلب فقلت لها أكيد .. أكيد بلعت ريالك ؟؟

قالت : لاااا بس انتظر ترجع الباقي!!!!

انا فطست ضحك قلت لها أي باقي.. على بالك بتصرف لك ( فكّه ) 🙂 ؟؟!!

قالت ( ببراءه ) ياأستاذه دخلت خمسه ريال ابي قهوه لكن ماطلعت لي لاقهوه ولا رجعت لي فلوسي!!

شرحت لها الوضع وقلت لها اقري على خمستك السلام بلعتها (المشين ) واللي كان كان .. أما أنا فصرت شاطره دخلت هالمره ريالين واستمتعت بقهوه (لزيزه أوي )

أدري بتقولون كل هالتمطيط عشان قهوه بس والله حقدت عليها ومتخيله كم وحده غلطت وكم الريالات اللي بلعتها فلازم افضفض شوي عشان تنتبهون منها ترى تدخلون ريالين ووراء بعض هاااه انتبهوووا )

بعدها طبعا تمت التحضيرات على قدمٍ وساق زارتنا رئيسة جامعة الرياض الأميره الجوهره بنت فهد بن محمد آل سعود وعدد من وكيلات العماده لجامعتي الرياض والملك سعود وألقت كل واحدة منهن كلمه كانت مميزه بصراحه واستمعنا لكلمة عمادة السنة التحضيريه جابوا بوكيه ورد يهبل لنا والله ( طولي ) 🙂  بس للأسف خفت اصوره واكسره .. ونسيت اصلا اصور لكم القاعه وتجهزيات الجامعه وهي فاضيه لكن عما قريب أوافيكم بالصور..

الحلو إن المبنى يسموه المبنى الذكي لخدماته وتجهيزاته المرموقه وعلى أعلى مستويات الجوده والتطور .

بعدها أخذنا انا وقروب الموظفات استراحه ناقشنا من خلالها عدة أمور في الحياة العامه .. أهمها الأيتام بلا هويه وكم الحقد الذي يملأ قلوبهم تجاه المجتمع وكيف نحن كأفراد أو مؤسسات يكون لنا دور في التخفيف من ألمهم وعذاباتهم إما بالتبني أو الأسر الصديقه و تقديم ما بوسعنا لتطوير مهاراتهم وقدراتهم ..

آلمتني قصص كثيره سردتها إحدى الأخوات التي تتبنى إحداهن وتقدم لهن دورات مجانيه بحكم أنها مالكة مركز حاسب ولغات لكن أبرزها هو قصة إحدى الفتيات التي سيقت للدار بعد ما أقام لها والدها عزاء معلنا موتها وهي على قيد الحياة !!

السبب هو اكتشاف الأب خيانة زوجته والفتاة كانت مع والدتها ولا علم لها بتاتا بتفاصل الحادثه لأنها كانت في سن المراهقه ولا علم لها أساسا بفعلة والدتها لكن خناجر الشك التي مزقت مشاعر الأبوه رمت بالفتاة في دار الحضانه مدعيا أنها ليست أبنته ، فطُلِقت الزوجه وأحيلت الفتاة لدار الحضانه ،هي الآن مشتته تقاسي حياة مريره بسبب شهادة الوفاة التي استخرجها والدها بإسمها ،متمرمطه من محكمه لمحكمه تطالب بحقوقها لا دراسه .. لا وظيفه .. لا إسم

فجأه أصبحت بلا هويه .. حية ميته وبقمة القساوه .. تبنتها اسره صديقه وأصرت عليها أمها البديله أن تصطحبها لزواج للترويح عنها فشاء القدر أن تقابلها إحدى معارفها فخرت صريعه تصرخ بوجهها أنتِ ميته .. أنتٍ ميته فحرمت الفتاة على نفسها الخروج في مكان عام !! ( حياة مؤلمه جدا)

كان نقاش رائع خرجنا منه بعلاقات وصداقات مميزه وأخوه أرجوا أن تستمر ..

بعدها حصل اجتماع على الطاير خفيف وسريع عرفنا من خلاله خطة الغد ، وانا خارجه أنا وزميلتي حصلنا وكيلة عمادة السنة التحضيريه لجامعة الملك سعود د. فاتن الزامل كانت قمه في الأخلاق واللباقه ومع أنها مجهده للغايه آخر الدوام ومشغوله بعدة أمور إلا أنها لم تنسى أن تشكر الموظفات واحده واحده قبل خروجها وتطلب منها تذوق ولو فنجان قهوه وقطعة شكولاته قبل الإنصراف.

أجمل شيء أن تعمل في بيئه ومع عقليات متفتحه و راقيه ومهذبه بنفس الوقت 🙂

شكرا للجميع وأعرف اني ثرثرت واجد لكن ماراح اضرب أحد اللي حابب يقرأ يقرأ .. واللي مو حابب فأشكره على مروره هنا 🙂